校園內幕

文: 花生明

首先呢，我有一樣開心同埋一樣唔開心既野要同個啲有追開睇校園內幕既朋友宣佈既。先講唔開心個單先啦，就係之前寫開個位靚姐大姨媽呀，佢決定唔再做啦。 拿，你地唔好問我點解呀？我都唔知架，佢可能做厭左掛，覺得成日要寫野咁鬼辛苦,不如早啲返屋企做佢少奶奶算啦。咁呢，大家又唔駛咁傷心既，我仲有一個好消息未講嘛。相信聰明既你地大概都會估到架啦。冇錯啦，校園內幕仲會繼續既,並由我花生明接手。我花生明會繼續貫徹番大姨媽既精神，帶大家一邊睇校園新聞，一邊食花生。

好啦，講左咁耐係時候入正題啦。話說之前咪有個週年大選既,話哂佢都係紅磚堡一年一度既盛事，我花生明又點可以唔留意姐。仲記得有一朝清晨，我諗住去尖東買花生食啦，點知未到尖東橋就已經有得食啦。平台果度岩岩進行緊OCON ,特別既地方係今次唔止CON一支莊咁簡單，而係一次過CON 4支喎。喂，咁難得既機會我花生明當然唔會放過啦，話哂一次過CON 4支莊咁HIGH 啵。再細心望一望候選內閣果D BANNER同埋LEAFLET。哦！原來係整衫&科學學院會同埋相關既3支學系會，分別係計數，物理同埋織布學系會。講起整衫&科學學院會,記得之前點票組織曾經係堡民會大樓3樓貼過公告出黎話呢支學院會係出缺架喎，點解出出下缺可以出左黎OCON 既？可能係我花生明老啦？對眼有問題睇錯BANNER D字又或者個腦已經老人痴呆有問題記錯個公告啦。 HAHA 我今次真係一頭霧水O 哂咀啦。

忽然間，無神神有一班人浩浩蕩蕩咁行埋黎，睇黎來者不善。細心一望之下，原來係點票組織既人。嘩！唔通開拖？果然，呢班點票組織既人一黎到就即刻同個四支組織現屆話事人行埋一邊咬耳仔。本來我花生明好想聽下佢地講咩，但始終講數呢家野都好難比其他外來人知，所以到最後都行唔到埋去聽野。佢地傾左一陣，果班點票組織既人好無奈咁就走左。見完場冇野睇，我都走先嚕。

不過呢，故事仲未完，好戲仲係後頭。幾日之後果班點票組織又係堡民會大樓3樓貼出另一張新既公告，主角竟然係個3支學系會，內容係話由於有非候選內閣成員出席ocon所以就要罰個3支學系會要係投票期最後一日倒扣16小時(後來點票組織運用酌情權將判罰修正為8小時)。睇完張公告，心入面即刻湧現一個問題： 內容入面既非候選內閣成員究竟係指邊支莊呢？唔通關果日班點票組織既人講數不果既事？平心而論，如果上述者係出現係個3支學系會既，咁佢地理應受罰；但如果唔係既話，又好似對呢3支學系會唔公平喎。始終週年大選投票期時間有限，如果因為呢個原因而搞到冇左8個鍾又真係幾唔抵。