校園內幕

校園內幕

文：花生明

「六月飛霜　個個笑得哀傷…」

唔知大家聽過未？呢首係陳奕迅嗰首＜六月飛霜＞。

喂，首歌真係好鬼好聽架，雖然已經出左街好耐，但我花生明都仲係咁鍾意聽，去到而家都仲係每晚不停咁 loop 足幾廿萬次。

呢個六月，紅磚堡飛霜了。

仲記得六月廿四號嗰晚，堡民會大樓3樓好不熱鬧，五湖四海既人都聚集哂呢度，預備去開高峰會。見咁大陣象，我花生明當然唔會放過呢啲機會啦，一於跟埋入去睇。嘩，今次嗰會同之前立法局開嗰啲會好唔同，人數以幾何級數增多，唔駛好耐成間329房就已經坐爆，真係行慢啲都迫唔到入去呀陰公！又難怪既，今次開呢個會既最主要目的就係俾大家去針下點分新生註冊日嗰陣既地盤。

個會一黎就開火喎，正所謂「唔怕生壞命，最怕改壞名」，各組織對嗰次自發性舉行既聯席會議個名同埋佢既常規約束力都抱有懷疑，就係呢樣野就同大莊嘈左個幾鐘呀陰公。另一焦點就係關於旅遊酒店組織既身分，由於嗰陣旅遊酒店組織俾人凍左莊，喺法理上佢地喺呢次會入面唔會有組織既身分。黎到呢度，問題就出現喇。如果喺個會度冇組織既名義，佢就會損失一個與會者所擁有既權力，包括最重要既投票權。拿，冇左投票權又真係幾大獲既，特別而家係講到爭地盤既時候喎！去到最後，佢地都係得返法定觀察員既身份咋，一票都冇得投。

之後就黎到成個會既高潮：討論地盤事宜。咁呢，大莊一開波就提左一個方案，另一邊啲學院又提左另一個方案。雙方都話以 Freshmen 既角度出發，講到自己知道哂幾千個 

---

Freshmen既諗法咁喎。之後成個會議就變左一個口同鼻拗既辯論擂台。你一拳，我一腳。就係咁，呢場爭論足足搞左成晚，耗時超過廿個鐘！去到最後都係要用投票黎解決。最後大莊以些微之差既票數 KO 對手。

「六月飛霜　世界怪得誇張…

誰又會鑑定誰正常　不知替哪個著想…」

也許，

「人人一把口 一百種真相

誰說得漂亮…」

唔好以為完左個會，分完地盤，組織既分歧就會完結。其實，好戲仲係後頭。

終於黎到正日啦，好野真係一單接一單，我地去片啦。

最精彩都係呢一單喇，話說註冊日嗰日有個好得既 FRESHMAN BB行過，各個架部當然唔會放過呢個機會啦，爭相去招待呢位新生。

為左奪取BB既歡心，福利舍既人當然要顯露返佢既男子氣慨啦，喺一輪花言巧語攻勢都同對手打成平手既情況之下，就同原本胖圓一家親既宣傳堂親戚隻揪，最後搞到連差佬都call埋，爭在未上生果動新聞咋！威就威喇，去到廁所咪又係踎低！

「即使你跟我比鬥已極平常

囂張得敢與天格鬥　才是榜樣」

講開又講，福利舍既人今年真係幾有心喇，唔知係咪因為KK唔夠Ken嬸handsome呢，搞到紅燈區連續兩年都熄燈喇，咁點繼後香燈呀？所以呢，佢地除左發散哂人手去迎接新生之外，仲有另一絕招：話說佢地就入左啲宣傳單張喺新生袋度，話咩上到大學要自己印筆記，如果要買影印卡就要去福利舍既影印場度買。可能啲BB岩岩入度黎紅磚堡唔知咩事啦，其實呢間大學有２種影印卡既，一張就係福利舍嗰張只限福記影印場使用既，另一張就係拉把影印卡，可以同時喺拉巴同埋M座既所有影印機用架。

本來介紹啲 Freshmen BB 去買影印卡真係值得一讚既，但聽返啲BB講，當佢地去到影印場嗰陣，居然有人同佢地講啲卡賣哂嚕，如果想買，就「主動」行上3樓福利舍既大本營啦。BB 仲話，上到去買完影印卡之後，福利舍既人仲好關心佢既大學生活添。可能佢地驚啲BB上到黎大學淨係參加正規既Ocamp，開學嗰陣就識唔到朋友啦，又或者驚佢地成個暑假流流長冇野玩，所以就推介左好多「私人」活動俾佢地喇！

講完福利舍，又點可能唔講埋佢既老對手又同時係哎吔親戚既宣傳堂姐，佢地都好有料架，除左派哂啲著到鬼火咁靚，化妝化到好似變身男女chokchokchok啲靚女既姐姐仔同高大有型既靚仔出黎迎接新生之外，仲識得「打」擊對手架，呢個頭先都講左啦。不過新生註冊嗰幾日咁多人出出入入，佢地著得咁少布，怕唔怕被人掂到都以為人地非禮呀？

仲有一樣野要講既就係成個註冊日既安排。先講人流控制先，今年註冊既速度真係異常地慢，新生未入方樹泉堂之前就已經要排一條好長既隊。我地偉大既學生會幹事都好識為佢地著想，特登派專人同佢地傾計，等佢地唔駛咁悶嘛！但係有啲傾傾下唔知點解就會無啦啦行開左，仲向住升降機既方向行添。至於講咩話題同去邊，呢啲野就留返俾大家諗下喇，相信睇完上文都有啲頭緒掛！

再講返註冊日攤位工作人員證件分配果度，可能係啲派證工作人員朝早未訓醒啦，竟然可以派錯證同派漏證，例如可以有非幹事會部委既組織拎唔到張提款証。嘩，如果你呢度派少張，果度又派錯左，每張失證問該組織收返五十幾蚊事小，影響到啲 Freshmen 報唔到心儀既O Camp事大喔，後果你都咪話唔嚴重。

總言而知，一個新生註冊日就俾你見到好多人既另外一面啦！有人口口聲聲公私分明，但其實互相包庇，力排異己，胖圓一家親喎；有人嗰頭攬頭攬頸，稱兄道弟，轉個頭為左自己個組織，可以六親都不認架，真係叛圓一家親嚕！咁又係既，對某啲人黎講，就算人格破哂產，始終「有仔送終」重要過一切！

睇完既 Freshmen BB ，千奇唔好驚喎，呢個其實係你入大學既必經階段。

「習慣了這異象　誰又在叫嚷」畢竟，「哪一個可　發育正常」